innenüüsa
Sunday, October 15, 2006
  woord
häb der soorg
pas uf di üüf
u llüog geng züon der
wen I fäällen
bliib nid furt
I frewwen mi
 
  hüüd an hüüd
hüüd an hüüd i fremdem land
oig in oig
und hand in hand
en aalta man
es lachimüül
u tüüsig grilli lachen in die läärri, läärri nachd

hüüd an hüüd im fremden land
oig in oig
und hand in hand
zämen siin
und gliich nid gheerren
u tüüsig grilli lachen in die läärri, läärri nachd
 
Tuesday, October 10, 2006
  ang
wien e stein
in enem teiffen, chaalten wasser
liid miis häärz u schwiigd.
wie schnee
wie schwärra, schläsma, füüla schnee
trikd s mer uf e schnüüf
und machd mer ang.
chun. gang.
 
  graawwgrienn
alls graaww und grien
es blääwtschelligs wiiss
e toon drin wie vun häärd
es eewwigs schwiigen, es iischchaalds rüüschen
u z mitts drin farbig tipf
root und gälb und violet
lüüt u luschdig
tumm u fräch
wuslen bleed dir fiischtri greesi
wissen nid
wie churz das geid
wie bees das chunnd
wie weenig bliibd
gääd.
 
Thursday, October 05, 2006
  Ramuz: Farinet old ds faltsch Gäld VIII
Ewch triww, Ier Bäärga, ewch und der Friiheit; wil er redt wiiter, und etzen d Tour Saillère und d Dents du Midi und ander Gipfla, waa wiit hinderhi siin - i Savoyen old ir Dauphiné; so läb wol, ganzi Wäld, läbid wol, ier Lender vur Äärden, er gseed sa all no eis - und der Himel ischd schwarza, d Stäärna siin wiissi, nid roded si me z ringsetum.

Das ischd der Oigenblick. Är gseed, das ischd der Oigenblick.
 
Monday, October 02, 2006
  Ramuz: Farinet old ds faltsch Gäld VII
Är zinted si no en Stumpen an uf siim Schopf. Er zinted si im Halbtüüchlen vur Lamm en ganz en frischa Stumpen an und lüogd uf ds groossa Liechd, waa üüfgeid uber siim Läben. Daa isch-sches, d Friiheit. E Froww und es Hüüs. D Bäärga siin scheenni, aber die hein is nid gäären... Die stään lüüter voor is ir Lufd, und wiiss, aber sie gseen is nid, und si losen is nid züo. Tüüsend siis, tüüsend u tüüsend - und mier, voor nen, allenggen...

Er faard si mid der Hand uber ds Wang; er seid si: "Das lengd nid, I müos mi no scheenn machen."

Er hed miessen d Latäärnen azinten, fir si z rassieren.
 

ARCHIVES
July 2006 / August 2006 / October 2006 / November 2006 / June 2007 / July 2007 / August 2007 / September 2007 / December 2007 / May 2010 / July 2010 / April 2017 /


Powered by Blogger